Shqipëria është kthyer në një koloni!

Vetëm nga dhjetë koncesione,

ku nafta mban vendin e parë,

dalin jashtë Shqipërisë,

mbi dy miliardë dollarë!

Këtu nuk janë llogaritur,

mobile telefonitë,

dhe milionat që nxjerrin,

bankat e nivelit të dytë!

Shto aty e shto këtu,

si shtohen lumenjtë tek deti,

dhe përfundimisht fluturon,

një buxhet i tërë shteti!

Me një llogari të thjeshtë,

po mos qenë koncesionet,

do qenë rritur dyfish,

edhe rrogat-dhe pensionet!

Dhe nuk shoh një shans të vetëm,

të mbarojë ky kijamet,

koncesioni më i shkurtër,

zgjat të paktën tridhjetë vjet!

Vite e vite me radhë,

gjithë gruri do dali jashtë,

dhe për popullin shqiptar,

do të mbetet vetëm kashtë!

Që në Dyzet e Katrën,

ne quhemi të çliruar,

po tani për ironi,

jemi një vend i pushtuar!

Ose që ta zbusim pak,

këtë të shkretë histori,

mund të themi-Shqipëria,

sot është një koloni!

Po bëj pyetjen e thjeshtë,

si do të rritet zhvillimi,

gjersa për botën e huaj,

këtu shkon çdo lloj fitimi?!

Ne rikthyem energjinë,

dhe pati zhvillim direkt,

në të gjithë ekonominë,

korenti pati efekt!

Po të qe rishtetëzuar,

edhe nafta-edhe kromi,

do kish zhvillim me dy shifra,

po s’ndodhi që ta shikoni!

Koncesionarët kudo,

me hile rrisin shpenzimet,

edhe për të ulur taksat,

kudo i fshehin fitimet!

Dihet-si të gjithë kusarët,

me dy bilance punojnë,

edhe fitimet e tyre,

në stratosferë i çojnë!

Koncesionet e mëdha,

këtu i bënë demokratët,

po në gjithë këtë hata,

socialistët s’janë të pakët!.

Kush betohet-do t’i prish,

kot së koti po ja fut,

se Gjykatë e Arbitrazhit,

brinjë më brinjë të këput!.

Këtu ishte pasuria,

me lugë floriri do hanim,

po kjo ishte strategjia,

asgjë për vete mos mbanim!

Në kohën e komunizmit,

Shqipëria qe vitale,

u bënë me këto pasuri,

investime kolosale!

Falas shëndet e arsim,

edhe një super ushtri,

zero borxhe jashtë e brenda,

dhe asnjë qindarkë kredi!

Si armike e vatanit,

punoi kjo politikë,

i dha për një copë bukë,

gjithë sektorët strategjikë!

Të paktën dhe njëqind vjet,

mavro Shqipëria ime,

do të jetë fare ibret,

do afrojë vetëm shërbime!

A.DUKA

21 tetor 2018